La Patrie dal Friûl in "sgnape"

Il gnûf numar dal mensîl par furlan

Al è rivât di pôc tes cjasis dai abonâts il gnûf numar de riviste mensîl “La Patrie dal Friûl”, che si presente cuntune vore di novitâts. Za de cuviertine si pues capî che la gnove impostazion sot de vuide dal gnûf diretôr Andrea Valcic e je chê di dâ spazi ai personaçs che a àn fat e che a fasin cognossi il Friûl no dome a livel locâl. A vierzi cheste gnove linie e je Giannola Nonino che intune lungje interviste firmade di Dree Venier e conte traviers la sô esperience direte in ce maniere che la lôr Sgnape e je deventade un prodot mondiâl. Ma no dome: la ocasion de interviste e je stade chê dal Premi Nonino e “Risit d'Aur”. Di chi il spont par une riflession sul rûl che al à vût il mantignî salde la lidrîs identitarie, savintle coniugâ cu la determinazion “tal impegnâsi e tal rivoluzionâ cualitât e imagjin” e marche Giannola Nonino. Une maniere di lavorâ che e je stade cjapade sù ancje des fiis Antonella, Elisabetta e Cristina Nonino che za di timp a son impegnadis tal puartâ indevant la aziende di famee, come che al ven fûr intun aprofondiment che al compagne la interviste.

Plui indevant, ricostruzion storiche su fats che a àn cuintriponût lis imposizion des autoritâts e la resistence dai coltivadôrs intes bataiis par un vin plui furlan. La prime part de riviste si siere cuntune riflession cun Sandro Sillani, professôr di Biologjie e Economie Agro-Industriâl de facoltât di Agrarie de Universitât dal Friûl che al aferme “Marketing? Il furlan al funzione”.
E simpri sul teme de promozion “par furlan”, la riviste e va indevant cuntune interviste firmade di Elena Zanussi a Aldo Rossi, che si è indotorât cun 110 e laude a Triest in Publicitât e Comunicazion di Imprese cuntune tesi sul “Marketing in marilenghe”.
Tra i personaçs sintûts su cheste Patrie e je ancje Elsa Martin, zovine cjantautore di Tumieç che e à par prime cirût di puartâ la lenghe furlane a Sanremo te sezion dai zovins: a intervistâle il so autôr dai tescj, Stiefin Montello, vôs dai FLK.
Ulderica Da Pozzo invezit e firme la fotogallery di chest mês dedicantle al Carnavâl tes isulis linguistichis di Tamau, Sauris, Resie e Vals dal Natison.
Chestis e tantis altris lis gnovis che si podaran lei sul prin numar dal 2010 da “La Patrie dal Friûl” che e sarà presentade tal Museu di Ruvigne in Vile joibe ai 25 di Fevrâr a lis 8 di sere, juste 2 dîs prime dal aniversari dal riviel contadin de Joibe Grasse dal 1511 che di cualchi an e ven ricuardade tant che Zornade furlane dai dirits come che nus dîs il puartevôs dal Comitât 482 Carli Pup intervistât di Enrico Turloni.
Tal archivi dal sît www.lapatriedalfriul.org si puedin lei ducj i contignûts de riviste fint al mês passât. Si ricuarde che “La Patrie dal Friûl” si le cjate tes miôr librariis e ediculis o si ricêf a cjase par abonament.
Ultimo aggiornamento ( venerdì 11 giugno 2010 )